Sqē′na lnagā′-i g̣ag̣odai′yañ wᴀnsū′ga. Giê′nhao Sg̣ā′na-djat-g̣aga-xē′gᴀñ u tcīag̣eā′lāg̣ᴀni giên Ya′ku-lā′nas, Tās-lā′nas, Ku′na-lā′nas, Sʟꜝê′ña-lā′nas, Stꜝawa′s-xā′-idᴀg̣a-i, Daiyū′-ał-lā′nas, Tcān-lā′nas.
Lnagā′-i g̣ā′g̣odi qa′⁺odi ʟ g̣ā′xa tcꜝū g̣ei ʟꜝ qꜝonanᴀ′ns giên tcꜝā′nawa-i g̣ei kū′na ʟꜝ dałg̣ai′g̣anᴀ′nsi giên gī′nᴀ qā′ʟ̣g̣ᴀns gañā′ñ g̣eiłgaña′ñ wᴀnsū′gᴀñ. Giên ku′ngi łg̣a kꜝᴀ′dᴀla ʟꜝ kiūqꜝā′-ig̣ada′ñasi giên g̣axaga′-i lnagā′-i gut gᴀ′ndax̣îtsī′ giên na-i ku′ngida xēlxā′nsi g̣ei qꜝā′xᴀda qꜝoa′lu gī ʟꜝ tcꜝidjū′djag̣adañag̣ᴀn łg̣ēt at ᴀ. ʟꜝ tcꜝidᴀłsī′ giên g̣ᴀn ʟꜝ qꜝᴀgā′ñag̣ᴀni.
Gañā′ñ ʟꜝ watcꜝag̣ā′dᴀñ qa′odihao lnagā′-i g̣a nᴀñ lā′na-a′og̣asi a′og̣a gui qꜝā′xada qꜝoa′lu ʟꜝ tcꜝī′dᴀłtcꜝai′yañ wᴀnsū′ga. Ha-i ʟ̣ū′hao ku′nag̣ēłsī′ giên tcꜝidalᴀ′ñ at tca′aʟ a′thao gut ʟꜝ îsdai′yag̣ᴀn.
Hai uiê′dhao gut ʟꜝ î′sda gut ʟꜝ î′sda qa′⁺odihao ʟꜝ qasag̣ai′yag̣ᴀn. Ya′ku-lā′nas qasā′g̣a. Ku′na-lā′nas qasā′g̣a, Sʟꜝê′ña-lā′nas qasā′g̣a, Stꜝawa′s-xā′-idᴀg̣a-i qasā′g̣a, giên Daiyū′-ał-lā′nas sg̣u′nxᴀn sila′iᴀg̣a g̣ā′g̣odaiyā′g̣ᴀni. Giê′nhao gu ʟꜝ naxa′ñ qa′⁺odi Lanai′ya g̣a ê′sîñ ʟꜝ tcꜝig̣ax̣unā′ñañ wᴀnsū′ga.
Gu ʟꜝ naxā′ndiasi. Gu ʟga ʟꜝ gutlā′gᴀs. Giên xᴀ′nłag̣a Ku′ndji lnagā′-i gu êsî′ñ Stꜝawā′s-xa-idᴀg̣a′-i lā′na-dag̣ag̣eā′lañ wᴀnsū′ga. Gut łtā′x̣ua lādai′yañ wᴀnsū′gᴀñ.
ʟꜝ nā′xa qa′odihao Lanai′ya gu nᴀñ Daiyū′-ał-lnaga′ djā′g̣a stꜝeg̣eā′lañ wᴀnsū′ga. Giê′nhao l’ stꜝeg̣iā′las g̣ala′-i g̣a l’ g̣oxagᴀ′ñsîñ⁺g̣as. Giên hᴀn ʟā′lᴀñ lᴀ kî′ñgugᴀns: “Dī kꜝō′tᴀł giê′nᴀ qꜝā′xada stᴀ′nsîñ dī qꜝe-ū′g̣ei xā′sʟdañ taga′-i dī gutlagᴀ′ñgīnî g̣aga′n ᴀ. Giê′nᴀ gᴀm dī tcꜝîsdjigū′sʟg̣ᴀñᴀñ. ʟꜝᴀ ʟꜝ tcꜝî′sdjigūsʟa′s gī dī łg̣oā′g̣agᴀñga.”
Giên g̣ā′la-i stᴀ′nsîñ l’ g̣ō′xagᴀña-i ʟ̣ū′hao g̣ā′lx̣ua l’ kꜝotwā′lañ wᴀnsū′ga. Giê′nhao djā′ag̣ᴀñ lᴀ tcꜝîtg̣ā′wasi. G̣āl stîñ g̣ea′las giên lᴀ ʟꜝ ʟ̣sʟtcꜝai′yañ wᴀnsū′ga. L’ ʟā′lg̣a qadjî′ñ łg̣ᴀ′mg̣alᴀ′ñᴀs giên ʟ qꜝᴀ′lg̣at l’ dᴀñʟ̣′sʟgîlgā′ñañ wᴀnsū′ga. Giên l’ qꜝeū′g̣ei qꜝā′xada stᴀ′nsîñ la xasʟa′s giên gᴀm lᴀ la tcꜝîsdjigū′sʟg̣ᴀñᴀs. G̣āla′-i qoa′ng̣ela′-i ʟ̣ū djā′g̣ᴀñ lᴀ qeā′ñg̣aiyes. G̣oda′-i g̣ei g̣ā′-isgîł yū′ᴀnᴀsi giên l’ sg̣ā′-iłas dᴀ′ñat qadjî′ñ g̣oda′-i at lᴀ qꜝa-itg̣a-ig̣adā′ñgᴀñasi.
L’ sg̣ā′-iłgᴀñ qa′⁺odihao gaatxᴀ′n sîñgaʟ̣a′nas tcꜝā′nuwa-i kꜝī′luła′si giên nᴀñ xᴀ′ldᴀña lᴀ dag̣ai′yas Ku′ndjî lnagā′-i g̣a ga sʟx̣î′tg̣ᴀtꜝadja′ñ wᴀnsū′ga. Giên nᴀñ lā′na-aog̣a′gas gia′g̣ei lᴀ qatcꜝai′yas l’ qꜝo′lg̣a djā′g̣a kꜝotwā′las g̣a l’ īnā′was. Nᴀñ lā′na-a′og̣as gi′tg̣a at gu′tg̣a l’ kꜝū′g̣adies.
Giê′nhao g̣a xᴀña′ñ lᴀ gîñkꜝū′g̣adasi giên î′sîñ gui lᴀ qē′xagᴀñasi. Giê′nhao dā′dja-i lᴀ îsda′si giên qꜝolg̣ᴀ′ñ gu lᴀ qā′tcꜝas. L’ ki′łdiyañ-qꜝa′-idadja′ñ wᴀnsū′ga. Giên hᴀn l’ sī′wus: “ʟan hao sg̣ā′-iłgaña. Inax̣uā′ l’ īna′og̣a.” Giên l’ qꜝo′lg̣a hā′yiñ l’ tia’djî′ñᴀs.
Giên î′sîñ g̣a lᴀ qā′dᴀsi. Ha′oxᴀn gu′tg̣a ʟꜝ gug̣ā′dies lᴀ qe′iñas. Giên î′sîñ qꜝolg̣ᴀ′ñ gi gi lᴀ nī′djiña′-i ʟ̣ū î′sîñ lᴀ ʟꜝ tia’djî′ñᴀs. Gañā′ñ lᴀ isstᴀ′nsîña′-i ʟ̣ū l’ kîl lā′g̣a la ya′ʼdasʟai′yañ wᴀnsū′ga. Giên qꜝolg̣ᴀ′ñ gi dā′-ixᴀn gī lᴀ nī′djîñᴀsi.
Giê′nhao g̣a lᴀ qā′dᴀsi. G̣ei lᴀ qintcꜝai′yasi. Yan l’ djā′g̣a l’ īnā′was lᴀ qe′iñᴀs. Guta′t ʟꜝ nā′ñgᴀñᴀs. Gutg̣ᴀ′ñ agᴀ′ñ ʟꜝ ʟqꜝᴀ′gᴀs.
Giê′nhao stᴀ lᴀ qā′-idesi. Sî′ñx̣aiya-i g̣a lᴀ qea′ʼtcꜝidi qa′⁺odi g̣a lᴀ qā′atꜝadjañ wᴀnsū′gᴀñ. Giê′nhao na-i g̣ei g̣atcꜝigā′ñg̣o tꜝa′łg̣a agᴀ′ñ lᴀ sg̣ᴀ′lg̣attcꜝias. Giê′nhao ʟꜝ skî′nudi qa′⁺odi ʟꜝ tā′-isʟaiyas. Na-i xā′-idᴀg̣a-i qꜝaxō′gᴀña-i ʟ̣ū g̣a lᴀ qā′gᴀsi. Gu′tg̣a kî′lgūldia′si. Giên qꜝasʟia′-i ʟ̣ū stᴀ lᴀ qā′-idesi.
Giên sîñgaʟ̣a′n xē′tg̣a l’ ga′o-ułas. L’ ga′owas. L’ ga′owas. L’ ga′owas. Sî′ñx̣ī stᴀ g̣a′tg̣a l’ qaʟꜝ′xas. L’ gū′dᴀña-i la′ogwañᴀs. G̣oda′-i lᴀ qea′ñasi. Qꜝaxada′-i sg̣un wa g̣a īdjā′ñ wᴀnsū′gᴀñ.
Dāg̣ala′-ig̣a sîñg̣aʟ̣a′n xē′tg̣a l’ ga′o-ułas. Tꜝᴀn g̣ei lᴀ qꜝa′-itnanᴀ′ñᴀs. Lᴀ g̣ā′łgas at lᴀ ta′odas at lᴀ skî′ndas. G̣e′ihao lᴀ qā′-itgoañañ wᴀnsū′ga. Giên lᴀ xā′g̣aʟꜝxai′yañ wᴀnsū′ga. Gᴀm ʟ xā′-idᴀg̣a lᴀ qîndagᴀ′ñasi. La sg̣u′nxᴀn g̣ᴀn ᴀ′ñg̣a u′nsᴀdᴀsi. ʟan l’ sg̣ā′-iłas. L’ gūdᴀña′-i lᴀ ūgoā′ñᴀs.
Giê′nhao sî′ñx̣aiya′s giên g̣a lᴀ qā′atꜝadjañ wᴀnsū′ga, giên naga′-i g̣ei agᴀ′ñ lᴀ sqᴀ′lg̣attcꜝa′si. Giê′nhao ʟꜝ qā′sʟʟꜝg̣a′gᴀs. Giê′nhao gia′gu ʟꜝ ta-ixā′ñᴀs g̣a la qā′gᴀs. Î′sîñ gu′tg̣a ʟꜝ kî′łguldi qa′odi ʟꜝ qꜝa′sʟia′-i ʟ̣ū nᴀñ īłiñā′gᴀs g̣ō′tg̣a lᴀ xā′dax̣îts giên l’ g̣ō′tg̣ei tꜝana′-i lᴀ gītcꜝa′si. Gᴀm l’ îłdā′g̣ᴀñᴀs. Giên nᴀñ djādā′gᴀs î′sîñ gañā′ñ lᴀ isdā′si. Lᴀ ʟꜝa qꜝakꜝu′ñu-î′ñg̣asʟas. Giên stᴀ lᴀ qā′-idesi.
Sîñg̣aʟ̣ana′-i ʟ̣ū Ku′ndjî lnagā′-i gu ʟꜝ sg̣ā′-igaxē′gᴀñᴀs. Nᴀñ gīdā′ga djatīnā′gas djā′g̣ᴀñ dᴀ′ñat kꜝōdaxā′go-uła′ñ ʟꜝ sī′wus. Giên lᴀ ʟꜝa gūdᴀña′-i lā′gᴀs. La ʟꜝa tcig̣ᴀ′nsg̣an g̣a qadjî′ñ lᴀ ʟ̣ā′nas giên lᴀ taodai′yas giên xā′-ida-mā′sg̣a gut ᴀ′ñg̣a lᴀ îsda′si. Nᴀñ djā′adas g̣ō′ga hao agᴀ′ñ gîñstꜝē′g̣îłdaiyañ wᴀnsū′ga, giên l’ ʟā′lg̣a l’ ʟ̣′sʟtcꜝas gañā′xᴀnhao nᴀñ lᴀ qatā′-idaiyas g̣a lᴀ qā′gᴀñ wᴀnsū′ga.
Giên lnagā′-i g̣ā′g̣odi qa′odi Qā′łgui lnagā′-i stᴀ nᴀñ qā′-idañ wᴀnsū′gᴀñ. L’ qagiagᴀ′ñ qa′odi yêłsqa′og̣a-i sū′ug̣ei nᴀñ g̣ᴀ′nʟ̣ᴀ tᴀmx̣iê′nʟꜝxa′si g̣ᴀ′nstᴀ lᴀ qā′ʟꜝxas. Ḷ′xakuns hᴀ′nhao l’ kig̣ai′yañ wᴀnsū′ga.
G̣ᴀ′nʟ̣a-i djî′nxa nᴀñ xā′-idᴀg̣a qā′g̣oñᴀsi. Gī′nᴀ kꜝū′gîñᴀsi ū kꜝug̣ā′wasi giên ū hī′g̣agîłda′si. Giên kīgayā′ñwa-i g̣ᴀ′nʟ̣a-i īnax̣ui′ ū qꜝā′datꜝadjasi. ʟłgiag̣a-g̣ea′lasi. X̣īʟ′x̣ug̣ā′dᴀsi. Īnax̣uā′g̣ea′lga-i ʟ̣ū łkꜝiā′na-g̣ea′lasi. Gā′-ikꜝugîñdā′ldᴀłsi. Giên nᴀñ ē′łiñᴀs gui′g̣añ îsdai′yasi. Tcī′na x̣āł stîñ g̣e′istᴀ lᴀ îsda′si lᴀ qe′iñasi. Giên ā′xada-i gu qᴀl stîñ gīxā′ñᴀs gu lᴀ qag̣adā′si giên tcī′na-i stîñ ū xā′x̣idasi giên dī′tgi wᴀ dᴀ′ñat qa′îłsi.
Giê′nhao āxada′-i g̣a lᴀ qā′g̣asi. Xᴀ′ñada lᴀ kꜝoa′îndasi. ʟa′łîñgī djī′guagasi giên “gatꜝag̣a′-i īnᴀ′ñgī g̣astî′ñ” hᴀn lᴀ kīg̣ada′si. Giên stᴀ lᴀ qā′-idesi. “Gatꜝaga′-i īnᴀ′ñgī g̣astî′ñ,” hᴀn l’ sū′us. Giên l’ ʟ̣′tꜝᴀłdagᴀñᴀs giên î′sîñ gui lᴀ stī′łsi. Giên î′sîñ lᴀ kꜝoa-î′ndagīsi giên î′sîñ stᴀ lᴀ qā′-idesi. “Gatꜝag̣a′i-īnᴀ′ñgī g̣astî′ñ” hᴀn l’ sū′us. Giên l’ ʟ̣′tꜝᴀłda′s giên î′sîñ gui lᴀ stī′łgᴀñᴀsi. Î′sîñê′sîñ lᴀ kꜝoaî′nda′si giên l’ qā′-ides. L’ ʟ̣′tꜝᴀłdas. Giê′nhao gī l’ qꜝā′-isgīdā′ñañ wᴀnsū′gᴀñ. Ga-i g̣aga′nhao ʟga′-i gi gī′nᴀ qꜝa′-idesi wᴀ gut qā′gᴀsi giên wᴀ gu ʟ̣′tꜝᴀłdagī′gᴀñ wᴀnsū′gᴀñ.
Giê′nhao lᴀ sqatg̣ā′g̣atcꜝuusi giên Daiyū′-ał-lā′nas ā′xada-i dag̣ag̣ea′lañ wᴀnsū′gᴀñ.
Giê′nhao ga′-istᴀ Sqē′na lnagā′-i g̣a ʟꜝ tcꜝīsdiā′lañ wᴀnsū′ga. Giê′nhao sqꜝā′sta gu ʟꜝ ʟ′g̣ołg̣asi. Ā′xada-i g̣ᴀ′nhao ʟꜝ wa′gañ wᴀnsū′ga. Giên ʟᴀl qꜝᴀl ê′sîñ ʟꜝ î′sdas. ʟꜝ î′sdagī′ga-i ʟ̣ū ā′xada-i î′sîñ Daiyū′-ał-djina′s xai′g̣ox̣ida′ñ wᴀnsū′gᴀñ.
Giê′nhao Sqē′na lnagā′-i qꜝō′łg̣a Gwī′gwᴀn-sʟꜝîñ gu nᴀñ g̣ᴀnʟ̣ā′gᴀs g̣e′ihao tꜝag̣onā′g̣añ wᴀnsū′ga. Nᴀñ Daiyū′-ał-lnaga′ g̣ᴀ′nʟ̣a-i dag̣ā′si, gi′tg̣ᴀñ ʟꜝa lᴀ lᴀ dag̣adai′yañ wᴀnsū′ga. Tꜝā′g̣ahao l’ djā′sg̣alᴀñ g̣ᴀnʟ̣a′-i g̣ei gī′nᴀ sqē′lᴀ î′sdax̣idā′ñ wᴀnsū′gᴀñ. Giê′nhao g̣ᴀ′nʟ̣a-i sg̣ā′nag̣wa-i qꜝalᴀ′ñ g̣ei qatcꜝa′s giên tān-dadjî′ndag̣e′iłs. Giên l’ łg̣ā′na sqꜝastᴀ′nsîñᴀs. Giên g̣ᴀ′nʟ̣a-i qā′łi gut lᴀ ʟ̣′dax̣îtsg̣ai′yañ wᴀnsū′gᴀñ. Giê′nhao qꜝā′tgu xᴀn l’ łg̣ā′ga qꜝaig̣ā′wag̣ᴀni giên g̣ᴀ′nʟ̣a-i ga′ogūg̣ā′ñ wᴀnsū′ga. G̣ᴀ′nʟ̣a-i sg̣ā′nag̣wa-i hao Sg̣ā′na-sa′nʟ̣ina-stᴀ′nsîns hᴀn kig̣ai′yāg̣ᴀni.
Giê′nhao ga′-istᴀ Tcꜝig̣ogī′ga g̣a ê′sîñ ʟꜝ tcꜝī′g̣ax̣una′ñag̣ᴀn. Giê′nhao qꜝê′nʟ̣g̣ā′g̣ada′-i ʟ̣ū skᴀntā′l gi ʟꜝ xa′ox̣ida′ñ wᴀnsū′ga. Qa′odihao g̣aatxᴀ′n nᴀñ ʟꜝ tia′-întcꜝawas. Lᴀ ʟꜝ kidjā′was. Lnagā′-i gu gu′tg̣a ga gwi′siwus ʟꜝ da′ox̣ida′si tꜝā′łg̣a nᴀñ g̣ā′xa skᴀ′ndᴀla-i qā′-idjîtwasi. Skᴀ′ndᴀla-i g̣e′istᴀ tꜝā′g̣ane gî′nᴀ g̣aʟꜝxai′yasi. G̣atgua′gañ wᴀnsū′ga. Nᴀñ g̣axā′s sg̣ā′-iłas ī′naat “Adā′adaga-i g̣a-ix̣i′dᴀñ” hᴀ′nhao l’ sā′wañ wᴀnsū′ga.
Giê′nhao î′sîñ ʟꜝ xa′odi qa′odi gaatxᴀ′n ʟꜝ xaoyä′nᴀs gu gī′nᴀ g̣ei ʟꜝ dᴀndadjañ wᴀnsū′ga. Giên ʟꜝ dᴀ′ñîsʟłasi. Gᴀm gī′nᴀ īdjᴀga′-i g̣ᴀn ʟꜝ u′nsᴀtg̣ᴀñᴀs. ʟꜝ īsg̣oa′gîda′ñas giên skᴀ′ndᴀla-i ʟꜝ u′nxᴀtgîłsi. Giên gī′nᴀ ʟꜝ dᴀ′ñsqꜝaʟî′ndjiwᴀs gu′tgi ʟꜝ qê′ñsqꜝag̣ā′gᴀña. Giê′nhao g̣ᴀ′nstᴀ nᴀñ qaʟꜝxai′yas qea′ñasi. Hᴀn l’ sī′wus “A-a-a aidja′si kꜝuda′-i gua īdjā′” hᴀn sā′wañ wᴀnsū′gᴀñ.
Sqē′na lnagā′-i g̣a î′sîñ ʟꜝ tcꜝig̣ax̣ū′nᴀñᴀs. Gu ʟꜝ naxā′ñ qa′odihao gu nᴀñ Daiyū′-ał-djī′naga gu dałgidā′lañ wᴀnsū′ga. L’ qe′igᴀs giên nᴀñ djā′da la qe′igᴀs. Giên î′sîñ qꜝê′nʟ̣g̣ag̣ada′-i ʟ̣ū ʟga-i g̣e′istᴀ gī′nᴀ sg̣ā′nag̣wa ʟꜝ g̣ᴀn ʟ̣′stas giên ʟꜝ g̣ag̣ā′tcꜝig̣ā′ñ wᴀnsū′gᴀñ. G̣a′odan-sg̣ā′nag̣wa-i hao īdjā′ñ wᴀnsū′ga.
Giê′nhao la ê′sîñ Qꜝā′stᴀ g̣a îsg̣ā′wañ wᴀnsū′ga. L’ ʟuqā′gîñg̣og̣ᴀ′ndixᴀn la g̣ᴀn lᴀ ʟ̣stᴀgā′wañ wᴀnsū′ga. L’ ā′xᴀnag̣ela′-i ʟ̣ū′hao l’ gī′tg̣a ʟx̣uqā′goañg̣ā′yagᴀs. L’ xē′łiᴀg̣ei la qꜝādai′yañ wᴀnsū′ga. ʟ̣ū l’ g̣agugia′si giên gu lᴀ î′sg̣ug̣oasi. G̣agᴀ′nhao “ʟua′stadjîgî′lgaña” hᴀn ʟga-i kig̣ᴀ′ñ wᴀnsū′gᴀñ.
Giên ʟā′lᴀñ dᴀ′ñat xᴀn gu lᴀ sg̣ā′-igadixā′ñg̣oas. Qa′odihao sî′ñgaʟ̣andāla′-i ʟ̣ū l’ qꜝā′sʟg̣oas. Sî′ñg̣aʟ̣an xē′txa l’ giū′g̣a nᴀñ g̣ā′xa sg̣ā′-iłas. Giê′nhao ʟgu sa′oga-i gī lᴀ qîñg̣ā′was. Sū łkꜝî′nxa g̣ag̣odia′ g̣a kun gā′-iʟ̣gî′ñ u′ngut nᴀñ g̣ā′xas ʟx̣uqā′g̣u′ndias. Î′sîñ sg̣ā′-iłdias. Giên gī′tg̣ᴀñ lᴀ ʟ̣x̣idā′ñ wᴀnsū′ga. Gī′nᴀ sg̣ā′nag̣oa xēłī′ᴀg̣ei gītg̣ᴀ′ñ lᴀ qꜝatai′yas ałha′o lᴀ ga ʟia′ʼdaiyañ wᴀnsū′ga.
Giê′nhao nᴀñ g̣axā′gᴀs xa īna′gᴀns gañā′ñ l’ î′sîs. Giên gaatxᴀ′n î′sîñ Qꜝā′stᴀ g̣a ʟꜝ tcꜝig̣ax̣unā′ñᴀs. Giên ʟ g̣ā′xa djā′da dᴀ′ñat ʟgoa′t l’ gᴀ′ndalg̣āwañ wᴀnsū′ga. L’ qā′giagᴀns gut lᴀ kꜝudjudā′las. Lᴀ ʟꜝ ste′idas. Gᴀm lᴀ gudᴀ′ñg̣ᴀñasi. L’ gᴀndā′ldi qa′odihao łkꜝî′nxᴀstᴀ gī′nᴀ sg̣ā′nag̣was ʟꜝa g̣a xēłā′ñ gī łg̣ᴀ′pdᴀldaalañ wᴀnsū′ga. Gᴀm stᴀ lᴀ qagᴀ′ñqā′g̣ᴀñasi.
Giê′nhao la g̣ᴀn l’ āxᴀnā′g̣ila′-i ʟ̣ū lᴀ la gīdjigī′łdas. Nᴀñ djā′das sʟꜝg̣u′ñ x̣iā′lāgᴀs g̣axaga′-i g̣ei qē′xaiyañ wᴀnsū′gᴀñ. Giên la g̣ei lᴀ dᴀ′ñnanᴀñᴀs giên lᴀ la xā′gudjañas. “G̣ō′tgūł xā′-idᴀg̣a-i xᴀn dᴀñ qîñīg̣awa′gᴀsga” hᴀn l’ sī′wus. L’ qā′dji lā′g̣a lᴀ qꜝadai′yag̣ᴀn. La′hao Ī′ʟꜝgᴀs hᴀn ʟꜝ kī′g̣adagᴀ′ñga.” Giê′nhao Daiyū′-ał-lā′nas lᴀ la tia′ʼgas at gūdᴀña′-i lā′gᴀñ wᴀnsū′ga.
Giên Qꜝā′stᴀ gu ʟꜝ naxā′ndies. ʟ l’ ʟ̣ā′g̣agᴀs g̣a′g̣añ lᴀ i′sîs g̣ᴀn gᴀm ʟꜝ u′nsᴀtg̣añañ wᴀnsū′ga. L’ nā′ñgᴀñ qa′odihao tcī′na lᴀ ʟ̣′sʟtcꜝai′yañ wᴀnsū′ga. Tcꜝū u′ngua l’ nā′ñg̣atcꜝus. Kꜝiäł la gi la qē′xagᴀñᴀs. Qa′odihao l’ dā′g̣alᴀñ stā′nsîñxai′yas nᴀñ da′og̣anagas giūga′was lā′g̣a l’ tā′agañ wᴀnsū′ga. Giên lᴀ si′łg̣a tcꜝidᴀ′n x̣āł lᴀ gañā′ñ g̣e′ida lᴀ sila′-iᴀg̣a lᴀ ʟ̣łinā′gañ wᴀnsū′ga.
L’ nā′ñg̣atcꜝiwa′-i ʟ̣ū l’ sila′-iᴀg̣ei lᴀ qē′xas. “Tā′xetg̣añ dina′ñ,” hᴀn l’ sī′wus. Tcī′na-i si′łg̣a ᴀ′ñg̣a l’ gū′dᴀñasi. L’ sila′-isi xag̣ā′gases hao lᴀ łiñg̣ai′yañ wᴀnsū′ga.
Gut l’ naxā′ñ qa′odihao nᴀñ kꜝwai′yagas kꜝodaʟ̣′g̣o-ułaiyañ wᴀnsū′ga. Giên dag̣ala′-ig̣a la gū′stᴀ nᴀñ qagā′gas kꜝōdaʟ̣′g̣o-ułas. Giên dag̣ala′-ig̣a î′sîñ nᴀñ kꜝodaʟ̣′g̣o-ułas. Hᴀn ēdjî′ndixᴀn djī′guag̣a kꜝō′daxā′g̣o-ułasi.
Giên gaatxᴀ′n g̣ālx̣uā′ nᴀñ da′og̣anas ta′-idig̣ᴀ′ndixᴀn l’ djā′sg̣a l’ tꜝa gi qꜝa′oʟꜝxas. L’ sqᴀnsg̣ā′djudie′s. L’ djā′sg̣a l’ g̣ō′da ʟ′gūdᴀñᴀs. Lᴀ qāłai′yasi. Giên l’ dā′łułda′s giên l’ g̣ō′tg̣ei l’ djā′sg̣a gī′nᴀ gītcꜝai′yas l’ dᴀlqꜝᴀ′lgutsg̣ā′łas. Giên lᴀ dᴀñsqꜝasdai′yasi giên lᴀ squ′ngudᴀñasi. Giên î′sîñ gañā′ñ lᴀ la isda′s. Î′sîñ l’ dałulda′s. Giên lᴀ dᴀñsqꜝasdai′yasi giên lᴀ qîñsqā′gîñᴀsi.
Giê′nhao g̣ō′dᴀx̣uaga-i lᴀ dᴀñsqꜝasdᴀga′-i ʟ̣ū′hao l’ g̣atuła′s giên g̣ᴀ′ltaxaga-i gī lᴀ xada′si giên djā′asîñ stᴀ lᴀ qā′gᴀñg̣ada′gᴀs. Giên l’ djā′sg̣a lᴀ ʟ̣g̣a dā′awas. A′nᴀñ qꜝā′-ig̣odies g̣adō′xa dā′g̣ᴀñ lᴀ x̣îtqag̣oñgoa′ñas. Lᴀ x̣îtgî′ndal qa′odihao Tꜝēs-qoa′naiya nā′g̣a g̣ei djā′asîñ stᴀ lᴀ qā′gᴀng̣atcꜝai′yañ wᴀnsū′ga. G̣e′istᴀ ê′sîñ dā′g̣ᴀñ lᴀ xagada′ʼgas.
Giê′nhao î′sîñ lᴀ lᴀ x̣îtgî′ndal qa′odihao Qa-it-gwa′-ig̣a gu lᴀ qaʟꜝxai′yañ wᴀnsū′ga. Giên qō′ya-iqā′gᴀn lᴀ tcꜝiła′si giên sʟ′xodjî g̣ei î′sîñ lᴀ tcꜝiła′si. Hᴀn l’ wag̣ᴀ′ndixᴀn łiña′xᴀn ʟga-i g̣a kꜝi-ᴀ′ng̣adasi giên łg̣ē′da-i wa g̣a l’ dastā′sgidesi. Kꜝī′wag̣eiłsi gut lᴀ qała′si. Kꜝiwa′-i lᴀ dᴀ′ñat agᴀ′ñ dᴀñgᴀmstᴀła′si, giên dag̣ᴀ′ñ gut l’ xagūłai′yañ wᴀnsū′ga.
Gagū′t lᴀ qag̣ᴀ′ngaʟai′yag̣ᴀn hao Tꜝā′xet-kꜝiū′ᴀg̣a hᴀn ʟꜝ kī′g̣adagᴀ. Taxeda′-i nᴀñ łî′ñg̣aiya′g̣ᴀni. Atha′o kꜝiwa′-i ʟꜝ kīg̣adagᴀ′ñgᴀñ. “Łgîtgia′g̣ᴀñ g̣a łᴀ ga xē′giłū′da Łgîtgia′g̣ᴀñ g̣a łᴀ ga xē′gᴀñū′da.”
Giê′nhao Qꜝā′stᴀ g̣a î′sîñ lᴀ qā′-idañ wᴀnsū′ga. Giên gu kī′g̣a ʟꜝᴀ gi lᴀ sū′udax̣idag̣ᴀn, “Xē′gîndā′lłas,” “Sg̣ā′na-djat-ʟg̣a′okꜝoa′nsg̣as,” “Sg̣ā′na-djat-lalā′g̣a-gut-skiä′mskun-nā′was,” “Na′g̣ei-ga′iłas,” “Sîns-g̣a-na-x̣utā′-ix̣iwas.” Giê′nhao “Sg̣ā′na-djat-kꜝia′g̣a-ga-xē′gᴀns” hᴀn da′og̣anᴀñ lᴀ kī′g̣adas. “Sg̣ā′na-djat-g̣a-ga-xē′gᴀns” hᴀn agᴀ′ñ lᴀ kī′g̣adas.
Giên Gîtîngī′djats sg̣oā′na qꜝadᴀ′ñ lᴀ qā′łdas. Giên l’ daog̣ᴀ′ng̣a î′sîñ lᴀ stᴀ qā′x̣iasg̣as. La′hao Qꜝā′stᴀ qꜝā′tgu gu ga kꜝoā′nʟꜝxagᴀñᴀñ wᴀnsū′ga. Giê′nhao g̣ᴀ′nʟ̣a-i qā′sg̣a agᴀ′ñ lᴀ ʟg̣ā′g̣eiłdaiyañ wᴀnsū′gᴀñ. La′hao tā′xeda-i dag̣ā′ñ wᴀnsū′ga. Gᴀm ʟꜝ ʟā′skîtgū′tg̣añgᴀñgā′ñagîn nᴀñ ʟꜝ tia′ʼg̣ases. Giê′nhao taxeda′-i qꜝā′si-lāgā′ñañ wᴀnsū′gᴀñ.
Nᴀñ djā′adas qała′s sila′-ig̣a hao ʟꜝ ā′xadax̣ida′ñ wᴀnsū′ga. Daiyū′ał-djina′s ā′xada-i xai′wasi. Giên l’ ā′xada qa′odihao gaatxᴀ′n Sg̣ā′na-djat-g̣a-ga-xē′gᴀns g̣ā′lx̣ua ʟꜝ qea′ñañ wᴀnsū′ga. Taol gia′at xē′dᴀx̣ustᴀ lᴀ tā′dᴀs. U′ngu sg̣ā′ltcꜝît gia′at lᴀ tā′dᴀs. Lā′g̣a ʟꜝ qea′ñañ wᴀnsū′ga. ʟꜝ ā′xadadi qa′odihao sg̣ā′lᴀña-i wᴀ gu lᴀ sg̣ax̣idā′g̣ᴀni. “A tcinā′ g̣aog̣ā′ gut łᴀ. Kudjū′giagᴀñdāl wᴀ gut ē kū′łgᴀłdā′lgîł.”
Tcꜝig̣ogī′g̣a lnagā′-i dī′tgu tcꜝū gia′gᴀñasi′hao ʟꜝdjat hᴀn kig̣ai′yañ wᴀnsū′ga. Lᴀ sagū′stᴀ nᴀñ djā′da nā′gᴀs. Gᴀm ʟgu ā′xᴀt łā′ña-i lᴀ łgia′l łiña′-i ga′og̣āñañ wᴀnsū′gᴀñ. L’ qꜝᴀl lā′g̣a g̣ā′awa ʟ′djiwus. Giê′nhao sg̣îl gā′-ikꜝugāwas lᴀ qēxa′s giên lᴀ ʟstai′yañ wᴀnsū′ga. Lᴀ gi lᴀ ᴀ′nłᴀg̣adas. L’ x̣êl wa g̣ei sg̣ā′djiwus. La g̣ei lᴀ ᴀ′nłas giên ʟꜝ ā′xadas g̣ei lᴀ xē′tgu lᴀ ʟ̣gî′ñgoañᴀs. Wᴀ gu taxeda′-i āxada′-i g̣e′istᴀ lᴀ sʟꜝsta′si giên la qai′îsi giên ᴀ′ñg̣a lᴀ qꜝā′dagᴀñasi.
Î′sîñê′sîñ gañā′ñ lᴀ ī′djiñᴀsi. Axada′-i ga dag̣ā′si tās xax̣idesī′ giên axada′-i at ʟꜝ xaskîtsg̣a′si giên “Ku′ndᴀx̣ūñ wā′dᴀg̣a-i.” Giên gaatxᴀ′n g̣ā′lx̣ua g̣ei lᴀ ʟ̣gî′ñgūña′-i ʟ̣ū łg̣a at la nᴀñ qꜝatsg̣a′s. Lᴀ gi qa′osgîtsg̣a′si. Gᴀm lᴀ gu g̣ałg̣ā′g̣ᴀñᴀs. Sîñgaʟ̣ana′-i gu nᴀñ djā′da tꜝē′stᴀ tā′xet kꜝu′ng̣odia gu ʟ̣′g̣o-ułasi.
Ga′-istᴀ lnagā′-i g̣ā′g̣odi qa′odihao nᴀñ kꜝwai′g̣alᴀñ qoa′nas wa′ʟ̣uxᴀn djatinā′g̣añ wᴀnsū′ga. Giên g̣ā′lx̣ua ʟꜝ ā′xadas. ʟꜝ gᴀ′nłg̣alᴀñʟꜝxas giên taxeda′-i ʟꜝ gūsgî′łsi. Djā′g̣alᴀñ dᴀ′ñat ʟꜝ tā′gᴀñesi. Gī l’ stała′si giê′nhao la ê′sîñ djating̣a′yañ wᴀnsū′ga.
Giên l’ djatia′ngatcꜝiwa′-i ʟ̣ū ʟꜝa at lᴀ ā′xadas giên g̣ā′lx̣ua l’ qā′ʟꜝxas giên tā′xet lᴀ gūdjiā′was. G̣alᴀ′nsʟia′-i ʟ̣ū djā′g̣alᴀñ lᴀ ʟskî′nxas. “Halᴀ′ gatā′” hᴀn lᴀ lᴀ sū′das. “Sʟgūs hao g̣ā′lx̣ua gatā′ga” giên ʟā′lᴀñ lᴀ kîlg̣e′idᴀxasʟa′s.
Giên dag̣ala′-ig̣a g̣ā′lx̣ua î′sîñ ʟꜝa at la axadā′gas. Giên ʟꜝ gᴀndā′lʟꜝxaga-i ʟ̣ū î′sîñ ʟꜝᴀ ga kitsgî′łs. G̣alᴀ′nsʟia′-i ʟ̣ū ʟā′lᴀñ skwa-i lᴀ tꜝā′ʟ̣gᴀñᴀs giên hᴀn djā′g̣ᴀñ lᴀ sū′udas “Sʟgus hao g̣ā′lx̣ua gatā′ga.” Giên la ê′sîñ lᴀ kîlg̣e′idaxasʟas.
Giên lnagā′-i g̣a na ʟꜝ ʟ′g̣ołg̣asi. Xā′ña ʟꜝ tꜝag̣onadai′yañ wᴀnsū′ga. L’ g̣eiłgīga′-i ʟ̣ū Tꜝa′g̣un-naas hᴀn lᴀ ʟꜝ kī′g̣adas. Ḷū′hao dī′da l’ ī′djas skꜝiä′xᴀn la g̣a gā′-iłx̣ida′ñ wᴀnsū′ga. La at ʟ̣ū ga′isʟia′-i ʟ̣ū kꜝîłg̣ax̣ida′ñ wᴀnsū′ga. Lᴀ tꜝa′g̣a ʟꜝᴀ gi gā′-iłx̣îtskiā′ñ ʟꜝ sūgā′ñañ wᴀnsū′ga.
Giên gaatxᴀ′n î′sîñ ʟꜝ ā′xada qa′odi g̣ā′lx̣ua ʟꜝ axadā′gatcꜝa′was. Nᴀñ djā′g̣a skudjū′dies. Tꜝᴀ′lgi nᴀñ ē′łiña ʟx̣iā′ndies. Giê′nhao l’ sʟꜝa-i lā′g̣a lᴀ qꜝa-itkꜝuʟai′yañ wᴀnsū′ga. L’ djā′g̣a ʟꜝa gᴀ′ñgîñañ g̣ā′tułas. Lᴀ lᴀ ʟdadjā′ñ wᴀnsū′ga.
Giên tā′not Ku′ndji g̣a tā-i gi nᴀñ ā′xadayä′nañ wᴀnsū′ga. Giên g̣alx̣uā′ l’ gi′tg̣a djadā′g̣a sqe′ux̣ua l’ qꜝadiʟ̣′gañ wᴀnsū′ga. Giên gī′tg̣ᴀñ ʟskī′nᴀña-i gi l’ łg̣oā′gas giên g̣āla′-ig̣a lᴀ ku′ndjigiä′lañ wᴀnsū′ga. La ê′sîñ qꜝadī′gᴀs. Siñg̣a′-i l’ skî′nxaiyas gitg̣ᴀ′ñ gi lᴀ kiagā′ñas. Gᴀm l’ gi′tg̣a ga′og̣ᴀñᴀs. Giên ʟua′-i stᴀ tān stꜝa′sᴀl kîtgî′łsi lᴀ qe′iñᴀsi.
Giê′nhao lnagā′-i xā′-idᴀg̣a-i tāns xā′-idᴀg̣a-i g̣ᴀn stꜝē′xag̣iłx̣idai′yañ wᴀnsū′ga. Xā ʟꜝ gî′ñ-īna′ʼqoa′nᴀs giên sqā′ba qoa′na î′sîñ ʟꜝ ʟ′g̣ołg̣as. Gᴀm ʟgu kꜝiū kī′da g̣a ʟꜝa gia′gᴀña-i ga′og̣ᴀñesi. Gañā′xᴀn ʟꜝ ʟꜝdax̣î′tsi.
Wᴀgañā′ñ ʟꜝ î′sda qa′⁺odihao xā′ga-i î′sîñ tā′na-i dōx̣idā′ñ wᴀnsū′gᴀñ. Gaatxᴀ′nhao na stᴀ xᴀn xā′ga-i ga da′wasi. Giê′nhao ʟ̣g̣a ga dā′wasi. A′xᴀnxᴀn tana′-i g̣atła′si. L’ gī′tg̣alᴀñ stîñ lᴀgi xā′dᴀsîs.
Łg̣ē′da-i ʟꜝ tꜝaqꜝā′-iłaiyasi. La g̣ᴀn gī ʟꜝ g̣ā′łg̣awa-i ʟ̣ū stag̣a′ñ lᴀ ʟg̣adā′ñasi giên kunᴀ′ñ tꜝᴀ′lgi la ʟłᴀskiä′gᴀñᴀsi. Giê′nhao xā′ga-i ʟꜝ ku′ntcꜝidañ wᴀnsū′gᴀñ.
Giê′nhao qā′-ida-i gū′stᴀ la g̣ᴀn ʟꜝ g̣agoyî′ñg̣oasi. Giên l’ î′stꜝałg̣oas giên łtā′x̣ulᴀñ gut tāna′-i tꜝanā′nᴀñasi. Giê′nhao lᴀ ʟꜝ g̣ᴀlgᴀ′ndax̣îtg̣ā′wañ wᴀnsū′ga, giên na′si l’ gutlā′g̣oasi. Gī′nᴀ kꜝā′na lᴀ ʟꜝ tadag̣ogā′ñañ wᴀnsū′ga. Gᴀm l’ kîłgūlg̣ᴀ′ñg̣oas. Giê′nhao tā′na-i gī′tg̣ei nāñ qa′odi xā l’ qꜝokꜝotu′łgag̣a′wañ wᴀnsū′ga. Giên l’ a′og̣a ê′sîñ l’ sî′łg̣a gūdᴀ′ñg̣oas gîñkꜝotwā′lañ wᴀnsū′ga.
Giê′nhao tā′na-i ʟꜝ ʟꜝda qa′odihao sqā′ba ᴀ′ñg̣a nᴀñ qî′ñg̣agiä′lañ wᴀnsū′ga. Gī′nᴀ xā′-idᴀg̣a la g̣a ga qꜝadag̣ā′dies giên tꜝa′g̣o lᴀ g̣ᴀlqꜝā′-igîñᴀs. Giê′nhao lᴀ la qꜝa-ig̣aʟꜝxai′yañ wᴀnsū′ga.
Giê′nhao lnagā′-i stᴀ nᴀñ qā′-idañ wᴀnsū′gᴀñ. Tcī′na-kun nā′g̣a g̣ei lᴀ qā′tcꜝas. Sg̣ā′na-qeda′s ʟꜝdā′las giên Tcī′na-kun nā g̣ei dā′lx̣unᴀñtcꜝī′gᴀñasi giên gatā′ga-i lā′g̣a ʟꜝ tā′gᴀñᴀsi. L’ qꜝaiya′s g̣aga′n la g̣ᴀn ʟꜝ nā′ñagᴀs.
Giê′nhao l’ nā′tg̣a łā′ma qē′xas giên lᴀ la ʟsta′s giên lᴀ la qꜝag̣adai′yañ wᴀnsū′ga. Giên gaatxᴀ′n sg̣ā′na-qeda′s ʟꜝdala′-i ʟ̣ū lᴀ hałgoa′das. L’ qā′g̣a tꜝā′g̣a la g̣ᴀn stꜝexagᴀ′nsi. Tꜝᴀ′lgi lᴀ xałgoa′dagᴀñasi. Qa′odihao lᴀ gui ga ʟ′sʟgîłs. Kꜝiwa′-i g̣a lᴀ qꜝog̣ā′wasi. Sʟnᴀñ lᴀ gia′ʼłdas giên sg̣ā′na-qeda′s dā′lx̣unᴀñtcꜝia′-i ʟ̣ū lᴀ kîtqꜝa′iadi′gas. Kiägī īdjiga′-i ʟ̣ū î′sîñ gañā′ñ lᴀ isda′si. Lᴀ g̣aga′nhao sg̣ā′na-qeda′s lᴀ gi ʟꜝ łg̣oā′g̣adañ wᴀnsū′ga.
Giê′nhao gaatxᴀ′n Sî′ñgidjigît nā g̣a lᴀ qā′-idañ wᴀnsū′ga. Giên hᴀn lᴀ la sū′das “Xā′-ides sîñ lā dī at gīnᴀ′ñg̣ansga” hᴀn lᴀ gi lᴀ sī′wus.
Waigiê′nhao Qꜝā′stᴀ qā′sg̣a djinā′ hᴀn kī′łgulʟdjā′wañ wᴀnsū′ga “Dalᴀ′ñg̣a ł gūdagīdᴀ′ñg̣asga. Daiyū′-ał-lā′nas ha-ilū′ qa′odi î′sîñ skꜝū′lg̣ilg̣ā′nses” hao la sūdai′yag̣ᴀn.
Giê′nhao gu tcꜝū ʟꜝ skîtg̣ā′g̣añ wᴀnsū′ga. Giên la g̣ei ʟꜝ qꜝā′tnanᴀñas giên lᴀ ʟꜝ g̣a-iłgalᴀ′ñʟꜝxas. Giê′nhao gī′g̣awa-i ʟꜝ ʟ′g̣ołg̣ai′yañ wᴀnsū′gᴀñ. Giên l’ g̣e′iłgīga-i ʟ̣ū Gīg̣a′o-ᴀ′ldᴀloas hᴀn lᴀ ʟꜝ kig̣adai′yañ wᴀnsū′ga. Giê′nhao gitg̣ᴀ′ñ gī′g̣awa-i lᴀ dag̣adai′yañ wᴀnsū′ga. L’ djā′g̣a Gîtînā′g̣añ wᴀnsū′ga. L’ Nayū′ᴀns-xā′-idᴀg̣a-i ku′nī hao idjā′ñ wᴀnsū′ga.
Giên ga Xo-iga′sga-i ga xē′gᴀñ ᴀ′ñg̣a dā′g̣añ wᴀnsū′ga. A′thao nᴀñ xo-igā′ kꜝotwā′lgᴀnqasā′gas giên ga xēgᴀ′ñgᴀñ wᴀnsū′ga.
Hao ʟ g̣e′idᴀñ.