Nᴀñ g̣ō′ñg̣a ēʟꜝxagidā′hao sî′nhao la ʟ′g̣ołg̣akꜝusʟai′yañ wᴀnsū′ga. Giên gaatxᴀ′n g̣ō′ñg̣añ qꜝołg̣a′og̣a lᴀ taginā′ñg̣agoᴀʼda. “Hū⁺” Sîñg̣aʟ̣a′n skꜝiä′ł gañā′ñ lᴀ sū′ugᴀñasi.
Gaatxᴀ′n gī′nᴀ taqō′łdjuułas. Sʟꜝa-i sg̣un qeā′ñgagasi. Sa′gui l’ yä′nañʟ̣x̣ia′ñwas. Giên la xᴀ′nłag̣a lᴀ qꜝā′g̣oʟꜝxas. Gīnᴀgī′nᴀga gutg̣ᴀ′n î′sîs wā′sg̣oga-i ʟꜝ kî′lg̣ołg̣a qa′odi gu′tgi ʟꜝ wa′x̣idies, giên lᴀ ʟꜝ tcꜝī′gᴀs. Giên g̣ō′ʟ̣ag̣a î′sîñ lᴀ wa′gas. Lᴀ ʟꜝ tcꜝī′di qa′odihao g̣oñg̣ā′ñg̣a ginagī′nagaga-i lᴀ tcꜝī′daʟ̣g̣agᴀs. Giên qꜝołg̣awa′-i g̣ei î′sîñ ga sqā′dax̣i′dᴀsi giên ga-i ê′sîñ ha-ilua′-i ʟ̣ū dīdᴀx̣ū′stᴀ ga g̣ā′g̣eidas g̣e′istᴀ lᴀ ga wā′sg̣oas. Ga-i î′sîñ qa-îłha′-ilusi. Giên gū′stᴀ ga g̣ag̣odai′asi. Ga-i î′sîñ qa′-îłsi. L’ g̣ō′ñg̣a lanā′g̣a gu′tg̣a staʟe′iłdaiyañ wᴀnsū′ga. Ḷg̣a î′sîñ lᴀ ga g̣ā′g̣odasi. Ga-i ê′sîñ qa′-îłsi. Giên lnagā′-i staʟe′îłxᴀn lᴀ tcꜝidā′asi. Giên g̣ō′ñg̣añ at a′uñ at djā′asîñ lᴀ wā′sg̣oas. Giên ga-i î′sîñ qa′-îłsi.
Gañā′xᴀnhao ʟū ʟꜝ dag̣agā′ñas gī ʟꜝ ʟ̣′łgałdas giên gū′g̣a ʟꜝ qasā′gias. Yä′nᴀñagᴀñ wᴀnsū′ga. Wai′giên daʟ′sdaiyasi giên kî′łgulqꜝa-idalsg̣ag̣ᴀ′ndixᴀn kîlga′o-usg̣asi.
Giên lnagā′-i gu la qā′⁺g̣oñgwañ qa′odi l’ g̣ō′ñg̣a tcꜝū dā′g̣agas lᴀ kîtx̣unᴀ′nsg̣as giên lᴀ la g̣ē′tg̣atsg̣adas. Giên sîn-qa′oda-i ᴀ′ñg̣a lᴀ tcꜝiłā′dag̣eiłsi giên kꜝu′x̣u lᴀ tꜝałgū′łs giên l’ ta′-iʟ̣gas.
Giên l’ ga-igā′gīgwā′⁺ñas. G̣ei lᴀ gi g̣ā′łdjūgᴀñgwā′ñas. Kꜝiä′ł lᴀ gi ʟ̣a′-iyas. Qa′odi gī′nᴀ l’ sū′udas “Dᴀñ tcî′ng̣a qō′niga-i dᴀñ qā′tcꜝi-xᴀ′lga.” Gī lᴀ qē′xaʟꜝxaiyasi. Gᴀm gī′nᴀ gut qꜝałg̣ā′g̣ᴀñᴀs. Sqᴀ′lg̣a sg̣u′nxᴀn lᴀ qe′iñasi. Łqea′ma qā′dji sg̣astî′ñ łg̣ēt l’ ga-ig̣ā′dᴀsgîñ.
Giên î′sîñ tcag̣ᴀ′ñ l’ ᴀ′nskides giên î′sîñ gañā′ñ gī′nᴀ l’ sū-udas. Giên kꜝux̣ua′-i xᴀ′ñē g̣e′istᴀ lᴀ qîñqꜝo′łdaʟꜝxasi. Ga′gu sā′wasi ya′si lᴀ qîndiᴀg̣ᴀ′ndixᴀn ya′ʼxōdada kꜝū′da kꜝᴀ′tdjîʟꜝxaga′-i atguʟ̣ū′ “Dᴀñ tcî′ng̣a qō′niga-i dᴀñ qa′tcꜝixᴀlga.”
Giê′nhao sîn-qa′oda-i gi ᴀ′ñg̣a lᴀ xā′g̣atsi giên łqeā′maga-i qā′dji lᴀ gīdjig̣ī′łdasi giên gu lᴀ qā′gias. Gia′g̣ᴀñ qā′dji stîñ gut lᴀ qā′x̣iatꜝᴀłs. G̣ayuwa′-i g̣ei l’ ga′og̣aiya-i ʟ̣ū′hao lᴀ qea′ñañ wᴀnsū′gᴀñ.
Na-i qꜝe-ū′gi lᴀ giā′xaʟꜝxaga′-i ʟ̣ū l’ tcî′ng̣a l’ qā′djixałs. “Qā′tcꜝi łᴀ tꜝakꜝî′ng̣a. G̣ō′ñg̣añ lanā′g̣a dā tcꜝidag̣ā′sʟa atxᴀ′n dī goa′di agᴀ′ñ dā ga′-igīx̣idas dᴀ′ñat kꜝiîñā′gᴀn, tꜝakꜝî′ng̣a.” Giên lᴀ qatcꜝa′si giên lᴀ la ga tā′das. A′hao ʟg̣a l’ qa′-isalañ wᴀnsū′ga g̣ō′ñg̣añ lanā′g̣a lᴀ tcꜝī′dag̣asʟaiyes sta ᴀ.
Giên l’ ūgī′ga-i ʟ̣ū hᴀn lᴀ la sū′udas “Halᴀ′ kungida′-ig̣a kiä sînqꜝōłdjū′gᴀn gū′stᴀ dīgi ga taxā′ʟ.” Giên g̣a lᴀ qā′x̣ułsi giên sîn gu qꜝołdjā′wasi g̣e′istᴀ lᴀ ga gī′xaʟas. Giên gī′nᴀ adā′asi lᴀ la daogoᴀ′das giên łg̣ēt êsî′ñ lᴀ tꜝaxā′ʟ̣as. Giên ga-i gi î′sîñ lā′g̣a lᴀ goa′was. Giên hᴀn lᴀ la sū′udas “Akungida′-ig̣a hao l’ qꜝołdjū′gani.”
Giên gī′nᴀ łkꜝiä′na wa′ʟ̣uxᴀn lᴀ î′sdaiya′-i ʟ̣ū kungida′-ig̣a xō′yag̣ā′ng̣a łg̣a-i qꜝołdjā′was g̣e′istᴀ lᴀ ga gīxā′ʟas giên lᴀ gi lᴀ xā′sʟtcꜝas. Giên “Ga-i î′sîñ” lᴀ gi lᴀ sī′wus. Giên lā′g̣a sî′ng̣ᴀn lᴀ ʟ′g̣ołg̣asi giên lā′g̣a lᴀ g̣eiłgī′daga′-i ʟ̣ū lā′g̣a ga sqꜝa′stîñ lᴀ x̣ūtx̣u′ldas. Lᴀ la qō-dā′g̣añadas giên nᴀñ lᴀ sqetsg̣adja′o dā′g̣ᴀñadas. Giên sqa′ola-i g̣aʟe′ił la g̣ᴀn lᴀ qꜝalᴀnda′asi. Qwē′g̣ao dāg̣ᴀñā′gasi. Giên lgūs gīʟe′ił î′sîñ la g̣ᴀn la xa′-idas. Wa′sg̣oag̣a g̣ᴀ′nhao la g̣ᴀn lᴀ wa′daiyañ wᴀnsū′ga.
Giên hᴀn lᴀ la sū′udas “Ā′sistᴀ dᴀñ ł ga-ig̣ā′gix̣idagîn. Dᴀñ gi g̣āl sg̣oa′nsîñ g̣e′ił giên lnagā′-i xē′tgu dᴀñ ga-ig̣ā′sgît giên dᴀñ nᴀñ tcꜝigā′gᴀn gī lnagā′-i qꜝaxā′g̣a dā tꜝaqꜝołtcꜝa′og̣aʟꜝxāsañ.” Giên gul-mā′łga-i ê′sîñ lᴀ gi lᴀ î′sdas. “Dā sî′ndax̣ît waigiê′nᴀ nᴀñ qōdā′g̣añas sg̣ō′lᴀgi sqalᴀ′ñgu dasqꜝā′sgidᴀñ. Sʟä′nagi î′sîñ nᴀñ sqetsg̣adja′o dā′g̣añas dasqꜝā′sgidᴀñ. Giên gu′tłg̣ᴀstᴀ dᴀñ gi ga g̣etgadā′ña dᴀñ g̣ᴀn sîndag̣ō′dᴀña xē′łi g̣ei ła gu′lg̣aga-i gutg̣a′atg̣a î′sdañ. Giên dā îsdī′gutgaña g̣ᴀ′nstᴀ saog̣e′iga. Gula′-i mā′łga-i xa′ołg̣ada giên gᴀm g̣ᴀ′nstᴀ lᴀ sū′ug̣ᴀñg̣oasᴀñ.”
Lᴀ la kî′ñgugᴀñg̣e′iłgīga′-i ʟ̣ū g̣o′da x̣ᴀ′tdju lᴀ tcꜝî′sʟsg̣as giên lᴀ la dᴀñgū′sʟᴀʟeiłas. Giên sʟꜝî′ñg̣eistᴀ skiä′mskun tꜝa′g̣un g̣adā′ lᴀ tꜝa′ostas giên l’ xᴀ′ña ku′ng̣ei lᴀ gī′dax̣idᴀs giên g̣a lᴀ łg̣a′-iłgalasi. Giên lᴀ dᴀñtꜝa′osdaiyasi giên g̣ā′-iya tꜝa′odjiwᴀsi. Giên gut lᴀ sʟꜝʟa′si giên lᴀ ʟ̣î′nasi giên î′sîñ wa g̣ei lā′g̣a lᴀ gītcꜝa′si. Giên î′sîñ wᴀgañā′xᴀn g̣e′idᴀsi giên sku′nxag̣îłsi giên xᴀ′nłag̣a lanā′ ê′sîñ gañā′ñ la g̣a lᴀ î′sdas. Giên la ê′sîñ sku′nxag̣ela′-i ʟ̣ū l’ xē′łᴀg̣ei î′sîñ lᴀ gī′dax̣idᴀsi. Ga-i g̣e′istᴀ êsî′ñ tꜝᴀm lᴀ qꜝotꜝa′ogañas g̣ā′lᴀñodᴀ. Skiä′mskuna-i tꜝag̣u′n gi tcꜝā′łskidesi wᴀ dᴀ′ñat lᴀ dᴀñtꜝa′ostasi. L’ djā′sg̣a stꜝagwa′-i g̣a-iyā′gas lᴀ qea′ñas hao l’ xᴀ′ñē g̣a-i at stꜝaxog̣ā′gañ wᴀnsū′ga. G̣aga′nhao lᴀ ʟꜝ tcꜝix̣idā′g̣ani.
Giên hᴀn î′sîñ lᴀ la kiñgugā′ñag̣ᴀn. “Lᴀ gi dā wa′aʟꜝxa giê′nᴀ nᴀñ g̣aiyawa′-i djîns djînłgoā′ñañ giê′nᴀ dᴀñ ga ʟstî′nda giê′nᴀ nᴀñ g̣ā′yawa-i kꜝuᴀ′nstcꜝiguñ.”
Ā′si gañā′xᴀn la wa′gasi. L’ xᴀ′nłag̣a lā′na î′sdisg̣aias giên nᴀñ g̣ayawa′-i djîns lᴀ djinłgoā′ñas. Kꜝiä′ł lᴀ g̣aʟ̣ā′gas. La ga ʟstîndawa′-i ʟ̣ū nᴀñ g̣ayawa′-i łtā′nᴀns lᴀ tcꜝī′igᴀs. Djila′-i lᴀ tcꜝī′gᴀsi.
L’ g̣aʟ̣ō′dias ʟ̣ū′hao l’ g̣ō′ñg̣a qꜝołg̣ā′wag̣alᴀñ sg̣oa′na la g̣ᴀn kꜝᴀga′ñ wᴀnsū′ga. “Hi hi hi hi hi Sînxē′gᴀño sqa′oala-i î′sîñ lᴀ tcꜝī′dax̣idiañ. Lgudja′-i î′sîñ lᴀ tcꜝīdax̣idia′ñ.” A′hao ʟ kīg̣ā′ñ lᴀ gwā′lᴀñ wᴀnsū′us ī′djî.
Giên la ê′sîñ îsdī′gᴀs giên djila′-i sg̣ō′lagi lā′na gi lā′g̣a djila′-i lᴀ dᴀñsqꜝasta′si. Giên gutłg̣ᴀ′stᴀ la g̣ᴀn ga sîndag̣ō′dᴀñagas la ga qe′iñᴀsi g̣ᴀ′nstᴀ saog̣e′ig̣a gula′-i xa′ołg̣atsi.
Giên l’ xaʟ̣g̣ā′das giên tcꜝiwa′-i lᴀ gī′gas giên sila′-ig̣ei lᴀ gui ʟa′ałs. Giên î′sîñ gwā′sgaoga-i l’ kî′lg̣ołg̣asi. Sqa′oala-i at lgudja′-i dᴀ′ñat xᴀn lᴀ wasg̣oa′si. Giên g̣eiłgīga′-i ʟ̣ū l’ xᴀ′nłag̣a ʟꜝ îsdī′gus. Giên nag̣astᴀgā′ñxᴀn nᴀñ g̣aiyawa′-i łtā′nᴀns lᴀ tcꜝī′sg̣a. Djila′-i lᴀ tcꜝī. Giên la ê′sîñ îsdī′s giên lᴀ ʟqᴀ′nskîtgīga-i ʟ̣ū nᴀñ sqetsg̣adja′o dā′g̣añas gī lᴀ dakꜝō′djîłsi giên djila′-i lᴀ dᴀ′ñsqꜝastas. Giên î′sîñ l’ xaʟ̣gā′dᴀs. Î′sîñ lᴀ gui ʟa′ał.
Giên î′sîñ wa′sg̣oga-i kîlg̣ołg̣ā′si. G̣eiłgī′ga-i ʟ̣ū î′sîñ l’ xᴀ′ñłaga ʟꜝ î′sdī giên î′sîñ nᴀñ g̣aiyawa′-i łtā′⁺nᴀns lᴀ tcꜝī′gᴀs. Djila′-i î′sîñ lᴀ tcꜝī. Giên î′sîñ lᴀ ʟꜝ qᴀ′nskîtgī′ga-i ʟ̣ū sg̣ō′lᴀgi lā′na gi lᴀ daqō′djîʟ giên djila′-i lā′g̣a lᴀ dᴀ′ñsqꜝastasi. Ga-i î′sîñ lᴀ gui ʟa′ałsi.
Giên g̣ō′ñg̣añ lanā′g̣a xa′-idᴀg̣a-i î′sîñ lᴀ djî′nłgoañᴀs. Lnagā′-i staʟe′ił lᴀ tcꜝis. Giên ʟꜝg̣aga′-i ʟ̣ū a-u′ñ at djā′āsîñ at g̣ō′ñg̣añ lᴀ tcꜝî′sgîna-i ʟ̣ū ʟꜝ qasagai′yañ wᴀnsū′ga. “Qwē′ig̣aqons” gī′tg̣a hao l’ tcꜝix̣ida′shao lᴀ tcꜝîskiä′nañ wᴀnsū′ga. Sqa′gi nᴀñ dā′g̣as gī′tg̣a hao īdja′ñ wᴀnsū′ga.
Hao ʟan l’ g̣e′ida.