Nañ g̣axā′hao qꜝodᴀ′s giên awu′ñ at qꜝosigwā′ñag̣ᴀn. Giê′nhao sqā′gi qul l’ a′og̣a lᴀ gi qꜝeitʟai′yag̣ᴀn giên g̣a lᴀ łtꜝē′gᴀñᴀsi. Kꜝaᴀ′ng̣adᴀñ lᴀ sī′usi giên l’ sg̣ā′-iłx̣idᴀs.
Lʼ sg̣ā′-ił qa′odihao lᴀ dᴀ′ñat lᴀ qā′x̣ułs. Giên sug̣ā′g̣odia g̣ei lᴀ la abā′gies. Giên wa g̣a sqagia′-i g̣a tcᴀ′tsg̣asʟasi giên qoā′nasi. Si′łg̣a lʼ gū′łsi. Giê′nhao lᴀ sg̣ā′-iłx̣idañ wᴀnsū′gᴀñ.
Lʼ sū′di qa′odi lʼ xē′tgu ga tcꜝaastiā′ñga ʟū tᴀ′mdju gug̣a′ ga-isʟʟꜝxa′s giên la g̣ᴀn ʟꜝ g̣agoyî′nʟ̣g̣as. Wai′giên gū′g̣ei lᴀ qaʟ̣′g̣asi. Giên lᴀ dᴀ′ñat ʟꜝ ʟuqā′ qa′odi lnagā′-i qea′ñgag̣eiłsi giên ya′ku tā′djîg̣a ʟꜝ î′sg̣oas nᴀñ qꜝō′las xē′tgu ᴀ giên ʟꜝa at lᴀ qa′îłs. Giên tadjx̣uā′ lᴀ ʟꜝ qꜝā′otcꜝidas giên lᴀ ʟꜝa ga tā′dax̣idaiyas. Na-i ku′ngida′-i g̣a nᴀñ tꜝē′djî łg̣ā′ga qꜝaoa′wasi hᴀn lʼ sū′udas: “Gᴀm ha′osi tā′g̣ᴀñ. Łᴀ ga tā′gᴀn hao dī tꜝē′djî gîñłg̣ā′gaga.” Gañā′xᴀn gᴀm lᴀ tā′g̣ᴀñᴀsi.
Ḷꜝa ał lᴀ nā′ñgasg̣agᴀñᴀs. Gaatxᴀ′nhao kꜝā′wa-i qꜝoldjū′g̣adasi giên lʼ qꜝā′was giên g̣olᴀ′ñałañ lā′g̣a xag̣ā′tcꜝas. Giên nᴀñ g̣ā′xa lʼ qêns giên la g̣ᴀ′nstᴀ kia′gañas: “A Qolqꜝᴀ′lg̣oda-i īʟꜝ nā′g̣ē tagā′⁺.”
Giên nᴀñ tꜝē′djî łg̣ā′gas hᴀn lʼ sū′udas: “Dᴀñ qꜝō′da giê′nᴀ lnagā′-i gia′ogi g̣ᴀnʟ̣ koaʼtꜝᴀ′mdᴀgasi g̣a qā′-idᴀn. Ḷū g̣ei tcī′na skug̣a′si sg̣oā′na ʟ̣′stagiłîn ʟ̣ū lʼ qꜝā′dañ giên la g̣ᴀn ʟ̣gwa-i ʟ′g̣ołg̣añ giê′nᴀ lʼ kî′tsgîłîn giên lʼ ʟ′gusi wa′ʟ̣uxᴀn ᴀ tā′gᴀñ. Tcꜝā′nuwa-i g̣ei łᴀ lʼ skū′djî sī′sgañ. Qo′nxᴀnᴀ sila′-i g̣ei dā′yiñᴀñ.”
Giê′nhao g̣a lᴀ qa′-idesi giên gañā′xᴀn lᴀ wa′gañ wᴀnsū′gᴀñ. Giên stᴀ lᴀ qā′ʟꜝxaga-i ʟ̣ū giên nᴀñ ē′ʟꜝxagidas gi′tg̣a xᴀ′ñē stꜝē′g̣ias. Giên nᴀñ tꜝē′djî łg̣ā′gas tcī′na lᴀ tā′gᴀs sila′-i g̣ei lᴀ la daiyā′ñg̣axałs giên gañā′xᴀn lᴀ îsî′si giên tcī′na xᴀ′ñē g̣ada′oxa ga stagī′dᴀñᴀs ʟ̣gwa-i gīdjiga′-i sila′-i g̣a la qē′xas. Giên lᴀ la îsg̣ā′sg̣as. Giên siłgiā′ñ lʼ qā′ʟꜝxaga′-i ʟ̣ū nᴀñ xᴀ′ñē stꜝīʟdjā′was gᴀm gī gī′nᴀ x̣ᴀ′tᴀsg̣ᴀñᴀs. Lā′g̣a lʼg̣ea′lasi. Tcī′nᴀs xā′-idᴀg̣a-i g̣ā′łᴀnda-i hao ʟꜝdᴀg̣ᴀn skū′g̣adaiyañ wᴀnsū′ga.
Giên nᴀñ tꜝē′djî łg̣ā′gas hᴀn î′sîñ lʼ sū′udas: “Dᴀñ qꜝō′dᴀłs kꜝiäł łᴀ g̣a qā′-idᴀñᴀñ. Skū′dji łᴀ da′-ixᴀn qē′iñᴀñ. Tcꜝā′nuwa-i g̣ei łᴀ sî′sg̣aʟ̣g̣ā′gᴀñᴀñ.” Giên gañā′xᴀn lʼ qꜝotg̣ā′xag̣îłs giên g̣a lᴀ qā′-idesi giên tcī′na-i lᴀ ʟ̣′sʟgîłsi giên g̣ᴀn lᴀ tcꜝā′naoda′si giên wᴀ gu lᴀ tā′gᴀñᴀsi. Gaatxᴀ′nhao nᴀñ xē′wē stꜝēg̣ia′lañ wᴀnsū′ga. Ḷū ê′sîñ g̣a lᴀ la dayā′ñg̣axałsi. Nᴀñ xē′wē gu lᴀ qē′xas. La ê′sîñ lᴀ sqꜝag̣ā′sg̣as. Siłgiā′ñ lʼ qā′ʟꜝxaga-i ʟ̣ū la ê′sîñ lʼgīłs.
Gu lᴀ î′sdi qa′⁺odi gaatxᴀ′n gū g̣a x̣iä′łʟꜝdālʟꜝxas. Ḷū wᴀ gu ʟꜝ′skîtsi giên na êsî′ñ x̣iä′łx̣idie′s. Giên nᴀñ tꜝē′dji łg̣ā′gas lʼ sū′udas: “Djā dī′tgi łᴀ qa-îłî′n ʟ̣ū łgᴀ′ñwal ʟā′dji gī xā′ʟ̣añ. Wa′djx̣ua na g̣a ʟꜝ x̣iä′łdies ku′ngida-i g̣ei łᴀ daxā′djîłtcꜝañ. Gᴀm ʟ̣g̣a qē′xatcꜝig̣ᴀñᴀñ.”
Giên gañā′xᴀn lᴀ wā′gasi. Giên lᴀ qꜝala′si giên g̣ei lᴀ qē′xatcꜝas. Gī lʼ tcꜝałᴀ′nskidᴀsi. Xa-inā′ñxan ᴀ′ñg̣a lᴀ dᴀñqꜝā′-iʟas. Lʼ xᴀñ inag̣wa′-i lag̣a kꜝawagux̣iā′ñas. Lᴀ stᴀ ᴀ′ñg̣a la xā′x̣unᴀñᴀs. Giên łgᴀ′ñula-i ê′sîñ lᴀ dᴀñłg̣ā′-stagwa′gasi. Kꜝā′wa-i gañā′gasi. Giên lnagā′-i gia′og̣a la qa′-idesi giên g̣ᴀnʟ̣a′-i g̣a lᴀ tā′gᴀsi.
Giê′nhao ī′nans xā′-idᴀg̣a-i ʟꜝdax̣idā′ñ wᴀnsū′ga. Ga′-istᴀ ga′g̣et qa′⁺odi tcī′nᴀs xa-idᴀg̣a′-i î′sîñ qasā′gix̣idies. ʟū g̣asg̣oā′nsîñ gū′g̣ahao ʟꜝ qasā′g̣ax̣idaiyañ wᴀnsū′ga xa-iʟ̣ᴀ′gui ᴀ. ʟꜝ ʟ′g̣aʟ̣. ʟꜝa g̣a ga stꜝa-iku′ndjidag̣a xᴀ′ñē stꜝē′gᴀsi wa′g̣a ʟꜝ′djida at stꜝē′gᴀsi agᴀ′ñ qî′ñg̣ogīxañasi. Gī ʟꜝ gwa′was. ʟg̣awa′-i g̣e′iłgīʟ̣ qa′odi sū′g̣ei ʟꜝ dā′yiñasī′ giên sg̣oā′na ʟꜝ qē′xasi giên ʟꜝ dᴀñgia′xasi giên ʟꜝ qꜝatatꜝᴀ′lgᴀñasi. Gᴀm ga ʟꜝ ʟgudā′g̣ᴀñasi. A′sʟda sg̣oā′na agᴀ′ñ sg̣ᴀ′lgaʟ̣s. Giê′nhao tanū′tga′s giên ʟꜝ stꜝa-i stꜝeqoā′ngᴀñᴀñ wᴀnsū′ga at xᴀ′ñē stꜝē′gᴀñ wᴀnsū′ga.
Giên Qolqꜝᴀ′lg̣oda-i î′sîñ ʟꜝa at qaʟ̣′gas. Wᴀ stᴀ qā′gîñ qa′⁺odi stᴀn ga′-igîñ ga-i ʟꜝ qēxai′yañ wᴀnsū′ga. ʟꜝ tꜝē′dji gu hā′-iluasi. Ga′-istᴀ sg̣ol ga′-igîñ g̣ᴀ′nstᴀ î′sîñ qā′ʟꜝxasi. Ga′-igu î′sîñ ʟꜝ tꜝē′dji ha′-iluᴀs.
Ga′-istᴀ qā qa′⁺odi qwēsdjî′ngoas g̣ᴀ′nstᴀ qā′ʟꜝxas giên lʼ łgî′tg̣a ga′-isʟ lʼ qꜝō′g̣ołdaga-i ʟꜝ kꜝwa-i-î′ndas. Lʼ qꜝō′ułdaʟe′iłiya′-i ʟ̣ū lʼ xē′txa ʟꜝ ʟuqaga′-i ʟ̣ū ʟuwa′-i taʟ̣djū′ g̣a qꜝoa′dᴀsi. Lᴀ ga qꜝō′gadᴀs. Giê′nhao taga′ogᴀñᴀñ wᴀnsū′ga.
G̣e′istᴀ qā′gîñ qa′⁺odi qꜝa′-idjig̣aos qꜝaogᴀ′ns gañā′ñ gī′nᴀ g̣e′ida g̣ei ʟꜝ qē′xas. G̣a′og̣ax̣ig̣atx̣iā′ hao īdja′ñ wᴀnsū′ga. Giên ʟꜝ łg̣u′nułxa at ʟꜝ stᴀnsî′ñxa at ʟꜝ ʟe′iłxa g̣ei qꜝaoxā′ñasi. G̣a′og̣aga-i yū′ᴀnsi′ giên ʟꜝ ʟaa′łxa g̣ei qꜝa′oxañasi. Giên Qꜝā′da-g̣ᴀ′nʟ̣a-i tꜝa′gi ʟꜝ ga′-isʟas la g̣a hao ʟꜝ idja′ñ wᴀnsū′ga. ʟꜝ ga′-iyiñgîñ qa′odi ʟꜝ gia′xas giên ʟꜝᴀ ʟꜝ ē′⁺yo-dā′gᴀñ. Giên ʟꜝᴀ ʟꜝ kîlg̣e′idaxā′s giên ʟꜝ qꜝa′otꜝᴀ′lgᴀñᴀs. Xā′-idᴀs hao ʟꜝ ē′⁺yodaga′ñañ wᴀnsū′ga.
Sîñx̣ia′s giên lʼ a′og̣a xᴀndᴀwā′gas sg̣ā′-iłgᴀñᴀs lᴀ qe′iñᴀs. G̣ō′ñg̣añ î′sîñ la qîñqā′g̣oñᴀs. ʟꜝ qā′yîñ qa′odi ʟꜝ kꜝia′og̣a tꜝa′odji ʟꜝ ʟ′g̣ołg̣añ ʟꜝ sī′wus. G̣astî′ñ qê′ñgałas giên ha′oxᴀn tꜝē′wan ʟꜝ sī′wus. Ga′istᴀ î′sîñ ʟꜝ qî′ñgałasi. Ha′oxᴀn tꜝē′wan ʟꜝ sū′usi. Wai′giên î′sîñ ʟꜝ qê′ñgałasi giên g̣eiłgī′gᴀñ ʟꜝ sī′wusi.
Giên x̣îlga′owas giên ʟuwa′-i djîn qā′łi g̣e′istᴀ tꜝā′skꜝi djiñ ʟꜝ dᴀñsqꜝā′sdᴀsi giên qō′yaqā′g̣ᴀn la at ʟꜝ kîtx̣idᴀsʟa′si. Gañā′xᴀn dālag̣e′îłsi. ʟū′goasi kꜝū′iñᴀsi. Gu′tat ʟ̣′nanᴀñᴀs. Tꜝa′odjiga-i ʟꜝ x̣îtgidᴀñgasäsi g̣ᴀn ʟꜝ qā′łi hî′ldᴀñᴀs. Gīga′o hao īdja′ñ wᴀnsū′ga. Gañā′xᴀn ʟꜝ skꜝū′x̣idᴀsi.
Ā′wuñ lᴀ sqā′dᴀs giên xē′tgu lᴀ sqū′g̣agatgîłs. Giên lʼ a′og̣a lᴀ gi ski′djiwus giên agᴀ′ñ lᴀ gīgoyî′ñʟ̣stasg̣as. Giên î′sîñ gañā′ñ lᴀ īdjiga′-i ʟ̣ū hᴀ′nxᴀn awu′ñ agᴀ′ñ lᴀ skîtkꜝō′tułdas.
Giên g̣aoʟ̣ g̣ᴀn lʼ a′og̣a lʼ qā′dji qꜝeitqꜝā′-iʟx̣idia′-i ʟ̣ū sqā′wa-i hayî′ñ lʼ x̣îl gut qꜝa′onanᴀnsi giên lᴀ qea′ñasi. Lʼ gi′tg̣a x̣ālxełgīstagia′ñas lᴀ sqā′dᴀs. Giê′nhao tcꜝū sku′nxa gu lᴀ la ʟ̣łinā′gas. Giên lʼ g̣ō′ñg̣a ga′g̣a tā′nadaiyes. Na-i u′ngu lᴀ la g̣ałînā′gᴀs.
Lᴀ gi g̣ālstᴀ′nsîñg̣ela′-i ʟ̣ū lʼ qag̣ᴀ′ñ g̣a qa′g̣otcꜝî′lg̣ax̣idies. Lʼ ʟꜝ′xadjî lā′g̣a qea′ñg̣ag̣eiłs. Lᴀ gi g̣ā′la i g̣ā′tsg̣aʟ̣asi kꜝiä′ł lʼ ʟ̣dā′lʟꜝxas. Qᴀ′odi lᴀ stᴀ tcī′na-i qꜝᴀl dā′lʟg̣oyasi giên na gi lʼ g̣ē′tg̣attcꜝas. Giên lʼ sg̣ā′g̣adᴀs. La g̣ᴀn ʟꜝ sū.
Giên stᴀ ʟꜝ tcꜝī′g̣ax̣unañasi giên anawa′-ig̣a î′sîñ gu ʟꜝ tcꜝigoa′gidᴀñesi. Î′sîñ tcī′nag̣ea′lga-i ʟ̣ū giên tcī′na-i skux̣ida′-i ʟ̣ū u′ngut nᴀñ x̣āł ʟ̣łîñgwa′ñasi. Giên lʼ kidaga′-i stᴀ lᴀ sī′wus giên la gi sg̣un ʟꜝ kîtdjū′gᴀñᴀs. Qa′odihao la g̣ᴀ′n kī′tao lᴀ ʟg̣ołg̣ai′yañ wᴀnsū′ga giên lᴀ la ki′dᴀS. Lᴀ la dᴀñʟ̣′sʟgila′-i ʟ̣ū tcī′na-i kꜝotula′-i at gu ʟ̣ū la êsî′ñ kꜝotwā′lañ wᴀnsū′ga. Lʼ g̣ała′nda-i î′sîs g̣ᴀn gᴀm lʼ u′nsᴀᴀtg̣añañ wᴀnsū′ga.
Giên lᴀ ʟꜝ ʟ′g̣ołg̣aqꜝawasi giên lᴀ qoa′gi ʟꜝ ʟłînā′gᴀs. Giên lᴀ gañā′ñ nᴀñ ʟꜝ ʟ′g̣ołg̣aʟ̣sʟas giên tcꜝā′nuwa-i djî′nxa lʼ skîtqā′g̣oñᴀsi. Ga′odjiwa-i î′sîñ lā′g̣a ʟꜝ skī′dᴀñasi. ʟā′guda la g̣ᴀn ʟꜝ sī′wus. G̣ā′la-i stᴀ′nsîñg̣ela′-i ʟ̣ū nᴀñ tᴀ′ñgīlaga g̣ei agᴀ′ñ lᴀ gā′sʟgīxᴀlgā′ñas g̣e′ihao lᴀ ʟꜝ g̣asʟgai′yañ wᴀnsū′ga. ʟā′łda u′ngu lᴀ tā′-idigañas u′ngu lᴀ ʟꜝ ʟta′-is. Giê′nhao lᴀ ʟꜝ îsdai′yañ wᴀnsū′ga. Ga′odjiwa-i ê′sîñ lā′g̣a ʟꜝ qꜝa′-isʟgiasi. Gu sg̣ō′łgułg̣añ g̣adā′ñ lʼ g̣atg̣ā′łgᴀłgîñ qa′odihao gīla′-i sʟꜝîñga′-i xᴀn lʼ gāgū′giesi. Uiê′dhao ta-inᴀ′ñg̣asas giên ga′odjiwa-i gīla′-i g̣a lā′g̣a ʟꜝ gudᴀ′ñxēgᴀ′ñgᴀñᴀñ wᴀnsū′ga.
Hao ʟan lʼ g̣e′ida.